Hugleiðingar formanns
Ágætu félagsmenn.
Fimmtudaginn 3. desember héldu samtökin okkar jólahlaðborð annað árið í röð í Skógarhlíðinni. Mér er það sérstök ánægja að segja ykkur frá því að mæting var með eindæmum góð. Fimmtíu og fjórir mættu, félagsmenn og gestir þeirra. Kvöldið tókst mjög vel þó að ekki væri um formlega dagskrá að ræða. Eftir opnunarávarp formanns og stuttan lestur úr nýútgefinni bók þar sem fjallað er um fyrirgefningu og sátt var borðhald og að því loknu las Sigurður Jón Ólafsson úr einni af bókum Péturs Gunnarssonar um jólatúr á togara fyrir fjörutíu árum eða svo. Að því loknu var hlutavelta með tveimur konfektkössum í vinninga. Dagskrá kvöldsins var þar með tæmd en gestir sátu þó margir áfram og spjölluðu um heima og geima. Er óhætt að segja að almenn ánægja hafi ríkt með kvöldið og sérstaklega þó veitingarnar sem komu frá Óðinsvéum.
Er það bæði von mín og fyrirætlan að þessi skemmtun verði endurtekin að ári.
Samtökin leggjast nú í jóla og áramóta dvala en næsti félagsfundur verður fimmtudaginn 4. febrúar 2010. Fyrirhugað er að það verði sameiginlegur fundur með CCU samtökunum og væri ánægjulegt að sem flestir sæju sér fært að mæta. Þessi tvö samtök eiga mörg sameiginleg áhuga og baráttumál.
Jón Þorkelsson, formaður Stómasamtaka Íslands
